Ҳизби наҳзати исломии Тоҷикистон ба ҷойи Акдемияи худ шуъбаи илм ва кор бо уламоро боз намуд. Худи Академия ҳанӯз соли гузашта бо талаби Вазорати адлия фаъолияташро қатъ карда буд, зеро тибқи оиннома, ҳизбҳо ба роҳандозии фаъолияти Академия дар назди худ ҳуқуқ надоранд.

Академияи ҲНИТ соли 2011 таъсис дода шуда, дар доираи салоҳияти худ мунтазам семинарҳои омӯзишӣ доир мекард. Дар сомонаи расмии ҲНИТ як гӯшаи махсусе мавҷуд буд, ки намояндагони Академия ба саволҳои марбут ба масоили динии корбарони сомона посух мегфтанд. Дар давраи сипаришуда ба беш аз ҳазорҳо савол посух гуфта шуда, даҳҳо семинарҳо созмон дода шуданд.

Тавре ба «Азия-Плюс» раиси шуъбаи нав Зубайдуллоҳи Розиқ хабар дод, акнун шуъбаи нав комилан аз фатво додан ё семинар баргузор намудан даст кашида, танҳо бо уламои кишвар ҳамкорӣ хоҳад кард.

Ёдрас мекунем, ки Вазорати адлияи Тоҷикистон бо нома ба раҳбарияти ҲНИТ муроҷиат намуда, ишора кард, ки ҳизб ба роҳандозии фаъолияти муассисаи таълимие чун Академия дар назди худ ҳуқуқ надорад.

Аъзои ҲНИТ ин амалро ба аз ҷониби намояндагони Академия гоҳ-гоҳ содир шудани фатво марбут медонанд. Кумитаи умури дин чандин маротиба таъкид дошт, ки ба содир намудани фатво танҳо мақомоти ваколатдор – Шӯрои уламо ҳуқуқ дорад. Мувофиқи Оиннома, ҲНИТ ба роҳандозии маркази илмӣ дар назди ҳизб ва баргузории таҳқиқот ҳуқуқ дорад.