Рӯзҳои 12-13-уми май дар шаҳри Душанбе таҳти сарварии муовинони нахуствазирони Тоҷикистону Қирғизистон Муродалӣ Алимардон ва Абдураҳмон Маматалиев ҷаласаи навбатии муштараки ҳайатҳои ҳукумати Тоҷикистону Қирғизистон оид ба таъин ва аломатгузорӣ дар марзи давлатии байни кишварҳо доир гардид.

Бино ба иттилои Вазорати корҳои хориҷии ҷумҳурӣ, дар ҷаласаи муштарак ҷараёни таъин ва аломатгузорӣ дар марзи давлатии Тоҷикистону Қирғизистон ва ҳамчунин маҷмӯи масоили марбут ба марз, аз ҷумла вариантҳои сохтмони роҳҳои мошингарди «Исфара – Ворух», «Кӯктош – Оқсой – Тамдик – Кишмиш» ва  масъалаи истифодаи чарогоҳҳои тобистона баррасӣ шуданд.

Роҳбарони ҳайатҳо ҳамчунин муноқишаи рӯзи 7-уми майи соли равон дар марз рухдодаро баррасӣ намуда, аз ин ҳодиса изҳори нигаронӣ карданд. Бо мақсади тафтиши воқеъбинонаи ин ҳодиса ва ҳамчунин минбаъд пешгирӣ ва роҳ надодан ба чунин ҳодисаҳо, ба мақомоти салоҳиятдори ҷонибҳо супориш дода шуд, ки ба кори гурӯҳи муштараки тафтишотӣ дар ин самт суръат бахшида шуда, гунаҳкорон ба муҷозот кашида шаванд ва ба ҷабрдидагон хисороти молӣ ҷуброн карда шавад.

Гуфта мешавад, ҷонибҳо оид ба минбаъд андешидани тадбирҳои ҳамаҷониба ҷиҳати пешгирӣ ва роҳ надодан ба ин монанд ҳодисаҳо тавофуқ ҳосил карданд.