Зимни ифтитоҳи ҳамоиши тиҷоратии соҳибкорони Тоҷикистону Белорус дар Душанбе сафири Белорус дар Тоҷикистон Олга Гаврук изҳор намуд, ки ҳафтаи оянда президенти Тоҷикистон Эмомалӣ Раҳмон бо сафари расмӣ ба Белорус ташриф меорад.

Ба гуфтаи ӯ, зимни гуфтушуниди дуҷониба сарони кишварҳо Эмомалӣ Раҳмон ва Александр Лукашенко масъалаҳои муҳими ҳамкориҳои сиёсӣ ва иқтисодиву тиҷоратиро мавриди барррасӣ қарор хоҳанд дод.

Дар ҷараёни ҳамоиш Гаврук зикр кард, ки ба роҳандозии ҳамкории судманд ҳарду ҷониби манфиатдоранд ва имконот дар ин самт ҳоло пурра истифода нашудааст. «Ба андешаи мо, маҳз бахши иқтисод бояд маҳаки рушди ҳамкории мо гардад», - иброз дошт сафир.

Бино ба маълумоти Гаврук, дар зарфи се моҳи соли равон ҳаҷми муомилоти молӣ миёни Тоҷикистону Белорус 9,2 млн. доллари ИМА-ро ташкил додааст, ки аз ин миқдор 8,2 млн. $ воридоти маҳсулоти Белорус ба Тоҷикистон буда, 1 млн. $ содироти маҳсулоти Тоҷикистон ба ин кишвар аст.