Нимаи дуюми рӯзи 17-уми май президенти Ҷумҳурии Тоҷикистон Эмомалӣ Раҳмон, ки ҷиҳати иштирок дар вохӯрии сарони давлатҳои узви Машварати ҳамкорӣ ва тадбирҳои эътимод дар Осиё бо сафари корӣ дар Чин қарор дошт, бо Котиби кумитаи Ҳизби коммунисти музофоти Хайнани Ҷумҳурии Мардумии Чин, роҳбари ин музофот Ло Баомин мулоқот намуд.

Бино ба иттилои хадамоти матбуоти сарвари давлат, дар вохӯрӣ масоили ташкил ва густариши ҳамкории Тоҷикистон бо ин музофоти тараққикардаи Чин баррасӣ шуда, ба масъалаҳои вобаста ба бунёди зербинои сайёҳӣ, ки дар бунёди шароити зарурӣ барои ҷалб ва қабули сайёҳони сершумор Чин таҷрибаи зиёд дорад, таваҷҷуҳи хосса зоҳир шуд.

Бо қаноатмандӣ тазаккур дода шуд, ки тайи 10 соли охир ҳаҷми гардиши солонаи мол миёни Тоҷикистону Чин аз сифр то ба 2 миллиард доллари амрикоӣ расид. Он ки ҳоло беш аз 2 ҳазор донишҷӯёни тоҷик дар ин кишвар таҳсили илм мекунанд, нишонаи таваҷҷуҳи хос ба густариши робитаҳои гуногунпаҳлӯ бо ин ҳамсояи бузург номида шуд.