Ҳукуматдорони шаҳри Панҷакент дафтари кории Ҳизби наҳзати исломии Тоҷикистон дар ин шаҳрро бастанд.

Бино ба иттилои сомоани расмии ҲНИТ, мақомоти иҷроияи давлатӣ дар шаҳри Панҷакент гуфтаанд, дафтари кории бахши ҲНИТ дар ин шаҳр расман ба қайд гирифта нашудааст, биное, ки ҳаст, ҳамчун мағоза ба қайд гирифта шудааст ва барои статуси идораи маъмурӣ ҳисоб шудани ин бино қарори раиси шаҳр лозим будааст.

Сино Ҳасанзода, масъули бахши ҳизб дар шаҳри Панҷакент дар ин робита изҳор намудааст, ки нахуст ҳукумат онҳоро хотиррасон карда буд, ки аз сабаби дар канори роҳ будани дафтари ҳизб эҳтимол онро тахриб намоянд. Вақте қарори қаблии хешро дигар карданд ва паҳнои роҳи автомобилгард аз 34 метр ба 18- 20 метр иваз шуд, дафтари ҳизбро бояд вайрон намекарданд, вале ба ҳар ҳол, қисмати бино тахриб гардидааст.

Масъулини бахши ноҳиявии ҲНИТ талош карданду боқимондаи онро обод карданд, вале боз ҳам ин ба ҳукуматдорон маъқул наомад. Ахиран, онҳо рӯи биноро “палатка” кашида, гуфтаанд, фаъолияти ҳизб дар ин ҷо манъ мебошад, чун бино ҳамчун макони тиҷорӣ сабти ном шудааст.