Рӯзи 30-юми июл вазири корҳои хориҷии Чин Ван И бо сафари расмӣ ба Тоҷикистон ташриф меорад.

Бино ба маълумоти департаменти иттилооти Вазорати корҳои хориҷии ҶТ, зимни сафар рӯзи 31-уми июл вазири корҳои хориҷии Чин бо президенти Тоҷикистон Эмомалӣ Раҳмон дидору гуфтушунид мекунад.

Ҳамчунин рӯзи 31-уми июл Ван И дар кори ҷаласаи Шӯрои вазирони корҳои хориҷии кишварҳои узви Созмони ҳамкории Шанхай, ки  дар қароргоҳи ҳукумат дар пойтахт доир мегардад, ширкат меварзад.

Санаи 1-уми август дидору гуфтушуниди вазирони корҳои хориҷии Тоҷикистону Чин дар назар аст. Худи ҳамон рӯз Ван И ба Пекин бармегардад.

Чин яке аз шарикони стратегии Тоҷикистон маҳсуб меёбад. Муносибатҳои дипломатӣ миёни кишварҳо 4-уми январи соли 1992 роҳандозӣ шуданд. Чин ба сегонаи шарикони бузургтарини тиҷоратии Тоҷикистон шомил мебошад.

Бино ба маълумоти ВКХ Тоҷикистон, соли 2013 ҳаҷми умумии муомилоти мол миёни Тоҷикистону Чин ҳудуди 2 млрд. доллари ИМА-ро ташкил додааст. Дар Тоҷикистон бисёр корхонаҳои бузурги Чин дар бахшҳои гуногун фаъолият доранд. Тайи 6 соли ахир ҳаҷми сармоягузории андӯхтаи Чин дар иқтисоди Тоҷикистон ба нишондиҳандаи 500 млн. доллари ИМА наздик мешавад.