Президенти Тоҷикистон Эмомалӣ Раҳмон ба мунсибати солгарди навбатии истиқлолияти Ҷумҳурии Ҳиндустон ба президенти ин кишвар Пранаб Мукерҷӣ барқияи табрикӣ ирсол намуд.

Бино ба иттилои хадамоти матбуоти сарвари давлат, дар барқияи табрикии Эмомалӣ Раҳмон зикр мегардад, ки комёбиҳои назарраси Ҳиндустон дар таъмини рушди босуръати иқтисодӣ боиси хурсандии дӯстони самимии Ҳиндустон ҳастанд ва Тоҷикистон аз ҷумлаи онҳост.

«Ҷумҳурии Тоҷикистон ба робитаҳои мустаҳкаму муассир бо Ҷумҳурии Ҳиндустон, ки бо он моро равобиту тамосҳои таърихӣ мепайванданд, манфиатдор аст. Ҳиндустон дӯсти боэътимод ва шарики муҳими мо дар минтақа мебошад, ки мо бо он муносиботи гунонгунҷанбаи мутақобилан судманд дорем. Мо ба сатҳи ин муносибатҳо баҳои баланд дода, ба рушду густариши минбаъдаи онҳо ҳавасманд ҳастем», - омадааст дар барқия.

Дар фарҷом сарвари давлати Тоҷикистон изҳори итминон мекунад, ки дар оянда низ бо саъю талоши муштарак кишварҳо метавонанд пайваста инкишофи равобити ҳасанаи ду кишвари дӯстро таъмин намоянд, ки он бидуни шак, ба нафъи халқҳо ва кишварҳо, амният, субот ва пешрафти умумии минтақа мебошад.