Зимни нишасти матбуотӣ дар Душанбе мушовири аввали сафоратхонаи Лаҳистон (Полша) дар Тоҷикистон Славомир Стшалковски изҳор намуд, ки айни замон ифтитоҳи намояндагии дипломатии Лаҳистон дар Тоҷикистон ғайриимкон аст.

Ӯ шарҳ дод, ки масъалаи мавҷуд набудани сафоратхонаи Лаҳистон дар Тоҷикистон ба мушкилоти молӣ марбут аст. «Вазорати корҳои хориҷии мо чун ВКХ Тоҷикистон аз имконоти зиёди молӣ бархӯрдор нест. Сафорати Тоҷикистон дар Лаҳистон низ дар шаҳри Берлин воқеъ аст», - иброз дошт ӯ.

Стшалковски таъкид дошт, ки онҳо ният доштанд дар шаҳри Хуҷанд як нуқтаи консулгарӣ боз намоянд, вале бинобар сабаби мушкилоти фаннӣ ин кор сурат нагирифтааст.

Ба қавли ӯ, шаҳрвандони Тоҷикистон раводид барои вуруд ба Лаҳистонро метавонанд аз намояндагиҳои длипломатии Лаҳистон дар шаҳрҳои Тошканд ва Алмаато дастрас намоянд.

Бино ба маълумоти сафоратхонаи Лаҳистон дар ҶТ, дар зарфи 5 моҳи соли ҷорӣ ҳаҷми муомилоти молӣ миёни Тоҷикистону Лаҳистон нисбат ба нишондиҳандаи ҳамин давраи соли гузашта ба андозаи 37% афзуда, афзоиши ҳаҷми содироти мол аз ин кишвар ба Тоҷикистон ҳудуди 30%-ро ташкил додааст.