Дар чанде аз шаҳру навоҳии ҷумҳурӣ конфронсҳои Ҳизби сотсиалистии Тоҷикистон (ҲСТ) доир гардиданд, ки дар онҳо вакилон ба анҷумани IX-уми дар моҳи декабри соли равон пешбинишудаи ҳизб интихоб шуданд.

Раиси ҲСТ Абдуҳалим Ғаффоров ба «Азия-Плюс» дар ин робита иттилоъ дод, ки то ахири моҳи октябр тамоми бахшҳои минтақавии ҳизб бояд вакилонашон ба анҷумани пешазинтихоботиро муайян кунанд. Дар анҷумани IX-уми ҲСТ иштироки беш аз 100 нафар вакилон дар назар аст.

«Дар маъракаи интихобот ба палатаи поёнии парлумон мо ният дорем, ки ба рӯйхати ҳизбӣ 14-15 нафар номзадҳоро шомил созем. Ғайр аз ин, аз ҳавзаҳои интихоботии якмандатӣ низ номзадии 3-4 нафар ҷонибдорони ҳизбро пешбарӣ карданием», - иброз дошт А.Ғаффоров.

Ба гуфтаи ӯ, имрӯз Ҳизби сосиалистии Тоҷикистон дар сафҳои худ ҳудуди 19 ҳазор шаҳрвандони Тоҷикистонро муттаҳид мекунад.

Ёдрас мекунем, ки Ҳизби сотсиалисти Тоҷикистон соли 1996 таҳти раҳбарии яке аз арбобони маъруфи сиёсиву давлатии ҷумҳурӣ Сафаралӣ Кенҷаев сабти ном шуд. Соли 1999 ӯ аз ҷониби қотилони номаълум кушта шуд. Соли 2002 Кумитаи иҷроияи марказии ҲСТ Мирҳусейн Нарзиевро раиси ҳизб интихоб намуд.

Як сол қабл аз интихоботи парлумонии соли 2005, замони ба эътилоф ворид шудани ҲСТ (Ҳизби сотсиалистӣ, Ҳизби сотсиал-демократӣ, Ҳизби демократ ва ҲНИТ) дар сафҳои ҲСТ мухолифат рӯйи кор омад. Ҳизби коммунисти Тоҷикистон мавқеи бетарафиро ишғол намуда, Ҳизби халқии демократии Тоҷикистон яккаву танҳо монд.

Ба андешаи коршиносон, он замон барои ислоҳи вазъи мавҷуда ва тағйири тавозуни нерӯҳои сиёсӣ аз ҷониби доираҳои ҳукуматӣ таҳти сарварии Абдуҳалим Ғаффоров Ҳизби сотсиалистии сунъӣ таъсис дода шуд. Бо ин амал Ҳизби сотсиалистӣ таҳти раҳбарии М.Нарзиев аз иштирок дар интихоботи парлумонии соли 2005 барканор карда шуд.

Айни замон ҳарду ҷиноҳи ҲСТ – яке бо роҳбарии А.Ғаффоров, ки расман дар Вазорати адлияи ҶТ сабти ном шудааст ва дигаре таҳти сарварии М.Нарзиев вуҷуд доранд, ки аз ҷониби ин ниҳод эътироф намешавад.