- Гурӯҳи шахсоне, ки дар хориҷи кишвар қарор доранду аҳолии ҷумҳуриро ба гирдиҳамойӣ даъват мекунанд, аз «рӯҳияи издиҳом» ва ҳақиқати одии тоҷикӣ – «Кӯр асояшро як бор гум мекунад» огаҳие надоранд, - гуфт дар мусоҳиба ба хабарнигори «Азия-Плюс» сиёсатмадори маъруфи тоҷик, пешвои коммунистон ва вакили палатаи поёнии парлумон Шодӣ Шабдолов.

Ба гуфтаи Шабдолов, «аввали солҳои ҷанги шаҳрвандӣ дар Тоҷикистон ба истилоҳ демократҳо ва исломгароёни тоҷик ба гирдиҳамойиҳои ғайриқонунӣ ва бемуҳлат ҷамъ омада, худ нафаҳмиданд, ки издиҳом ба наздикӣ аз таҳти назорати онҳо берун меравад ва ҷанги бародаркуш оғоз мегардад».

Дар идома ӯ аз гуфтаҳои файласуф, мутафаккир, сиёсатмадор ва нависандаи асрҳои XV-XVI-и Италия Никколо Макиавелли иқтибос овард, ки ба сиёсатмадорони замони худ чунин муроҷиат карда буд: «Ҷангҳо бо иродаи шумо оғоз меёбанд, вале бо хоҳиши шумо ба охир намерасанд».

«Шахсоне, ки ба ҳукумат норозигӣ баён карданианд, метавонанд аз ҳуқуқҳои конститутсионии худ – баргузор намудани гирдиҳамойӣ ва раҳпаймоиҳои қонунӣ истифода кунанд, ки амнияти онхоро сохторҳои дахлдор таъмин мекунанд», - афзуд номбурда.