Гурӯҳи таблиғотии аз ҷониби ситоди марказии пешазинтихоботии ҲХДТ таъсисёфта ахири моҳи январ ҷиҳати баргузор намудани вохӯриҳо бо муҳоҷирони кории тоҷик ба Русия раҳсипор мегардад.

Усмон Солеҳ, мудири шӯъбаи таблиғот, иттилоот ва матбуоти Дастгоҳи КИМ ҲХДТ дар ин робита иттилоъ дод, ки гурӯҳи таблиғотии ҳизб аз 13 нафар фаъолони дорои таҷрибаи кор бо интихобкунандагон иборат аст.

«Аъзои гурӯҳ муддати 10 рӯз аз шаҳрҳои бузурги Русия – Маскав, Санкт-Петербург, Уфа, Қазон, Екатеринбург, Новосибирск, Челябинск ва ғайра боздид намуда, бо муҳоҷирони кори тоҷик суҳбату вохӯриҳо доир менамоянд, ки  дар онҳо муҳтавои барномаи пешазхинтихоботии ҲХДТ-ро шарҳу тавзеҳ медиҳанд. Қабла аз сафар ба Русия ба таблиғгарон аллакай муовини аввали раиси ҳизб Саидмурод Фаттоҳзода дастуру супоришҳо дод», - иброз дошт ӯ.

Зимнан зикр гардид, ки Кумитаи иҷроияи ҲХДТ дар шаҳри Душанбе низ ният дорад, ки то интихобот гурӯҳи таблиғотии худро ба Русия сафарбар созад.