Раиси Ҳизби сотсиал-демократии Тоҷикистон (ҲСДТ) Раҳматилло Зойиров рӯзҳои истироҳати ҳафтаи сипаришуда бо сокинони шаҳрҳои Исфараву Конибодом, Истаравшану Чкаловск ва ноҳияи Спитамени вилояти Суғд 9 вохӯрӣ гузаронида, ба интихобкунандагон барномаи пешазинтихоботии ҲСДТ-ро шарҳу тавзеҳ дод.

Раҳматилло Зойиров тариқи телефон ба «Азия-Плюс» дар ин робита иттилоъ дод, ки интихобкунандагон ба масъалаҳои марбут ба ҳифзи иҷтимоӣ, таҳкими амният, муҳайё кардани ҷойҳои нави корӣ ва мубориза бо коррупсия бештар таваҷҷуҳ зоҳир мекунанд.

«Зимни вохӯрӣ бо интихобкунандагони шаҳри Конибодом, ки аз ин ҳавза муовини ман дар ҳизб, доктори улуми ҳуқуқшиносӣ Шокирҷон Ҳакимов ба курсии вакилӣ дар палатаи поёнии парлумон пешбарӣ шудааст, ба интихобкунадагон моҳияти платформаи пешазинтихоботии ӯ ва нақшаҳои номзад ба вакилӣ шарҳ дода шуданд», - иброз дошт ӯ.

Ба таъкиди раиси ҲСДТ, дар ҳамаи вохӯриҳо ба интихобкунандагон маводи таблиғотии ҳизб тақсим карда шуд.

Зимнан зикр гардид, ки имрӯз, 16 феврал вохӯриҳои Раҳматилло Зойиров бо сокинони шаҳри Панҷакент дар назар аст.