Сафири Иёлоти Муттаҳидаи Амрико дар Тоҷикистон Сюзан Эллиотт бо рӯзноманигорони тоҷик мулоқот ороста дар мавриди манфиатҳои кишвараш дар минтақаи Осиёи Марказӣ  се ҷанбаи муҳими он - субот ва амният, рушди иқтисодӣ ва дастгирии озодии баёну ҳимоят аз ҳуқуқи инсонро зикр кард. «Дар маҷмӯъ метавонам бигӯям, ки ин се ҷанба асоси ҳамкории ИМА бо Тоҷикистон аст», - иброз дошт ӯ.

Сюзан Эллиот бар ин назар аст, ки ИМА муносибатҳои бисёрсамтаи худ бо кишварҳои минтақа мутобиқи ин се ҷанбаро бояд беҳтар кунанд. «Ба андешаи ман, кишварҳои минтақаи Осиёи Марказӣ бояд миёни ҳамдигар ва ҳамчунин бо Русияву Чин мунсибатҳои хуб дошта бошанд. Ҳамчунин Тоҷикистон бо Русия бояд ҳамкории хуб дошта бошад,зеро ин кишвар муддати тӯлонӣ як қисми Иттиҳоди Шӯравӣ буд ва ғайр аз ин, бисёре аз шаҳрвандони Тоҷикистон дар Русия кору зиндагӣ мекунанд», - қайд кард ӯ.

Ба гуфтаи сафир, ҳадафи ИМА рушди ҳамкориҳои гуногунҷабҳа бо кишварҳои минтақа, аз ҷумла Тоҷикистон баҳри пешбурди се ҷанбаи дар боло зикршуда аст. «Аз лиҳози таъмини амният метавонам илова кунам, ки таҳдидҳои аз минтақаи Осиёи Марказӣ бармеомада - қочоқи маводи мухаддиру терроризм ва ғайра ба амнияти Русия ва Аврупо низ таъсир расонида метавонанд», - гуфт Сюзан Эллиот.