Муовини вазири корҳои хориҷӣ Низомиддин Зоҳидӣ бо ҳайати Шоҳигарии Норвегия таҳти роҳбарии сафири Норвегия дар Тоҷикистон (бо қароргоҳ дар ш. Остона) Оле Йохан Бёрной дидору гуфтушунид кард.

Бино ба иттилои Вазорати корҳои хориҷии ҶТ, дар рафти вохӯрӣ масъалаҳои ҳамкории дуҷонибаи Тоҷикистону Норвегия ва инчунин раванди татбиқи лоиҳаҳое, ки аз ҷониби Норвегия дар Тоҷикистон маблағгузорӣ карда мешаванд, муҳокима шуданд. Ҷонибҳо зарурати истифодаи иқтидорҳои мавҷударо ҷиҳати рушди ҳамкории дуҷониба миёни давлатҳо, бахусус дар соҳаи гидроэнергетика қайд намуданд.

Мусоҳибон ҳамчунин оид ба масъалаҳои мавриди таваҷҷуҳи тарафайн, аз ҷумла вазъият дар Афғонистон, муҳоҷират ва сатҳи ҳамкории минтақавӣ дар Осиёи Марказӣ мубодилаи афкор намуданд.

Дар анҷоми мулоқот муовини вазири корҳои хориҷӣ сафири Норвегияро ҷиҳати иштирок дар Конфронси байналмилалии сатҳи баланд роҷеъ ба натиҷаи татбиқи даҳсолаи байналмилалии амал «Об барои ҳаёт» 2005-2015, ки 9-11 июни соли ҷорӣ дар шаҳри Душанбе дар назар аст, даъват намуд.