Машварати навбатии сайёри раисони Кумитаҳо (комиссияҳо) оид ба мудофиа ва амнияти парлумонҳои кишварҳои узви Созмони Аҳдномаи амнияти дастаҷамъӣ (СААД) дар назди Шӯрои Ассамблеяи парлумонии СААД рӯзҳои 26-27 май дар Душанбе баргузор мешавад.

Раиси Кумитаи оид ба мудофиа ва амнияти палатаи поёнии парлумони Тоҷикистон Ҷӯрахон Маҷидзода ба «Азия-Плюс» дар ин робита иттилоъ дод, ки машварат дар шаҳри Душанбе таҳти раёсати роҳбари Комиссияи доимии Палатаи намояндагони Маҷлиси миллии Ҷумҳурии Беларус оид ба амнияти миллӣ Валерий Гайдукевич доир мегардад.

Ба гуфтаи Маҷидзода, вакилони парлумони кишварҳои узви СААД дар қатори баррасии лоиҳаҳои қонунҳои модулӣ, ҳамчунин аз марзи Тоҷикистону Афғонистон низ боздид намуда, бо шароити будубошу хизмати марзбонони тоҷик аз наздик ошно мешаванд.

«Ғайр аз ин, намояндагони парлумонҳои Русия, Беларус, Арманистон, Қазоқистон, Қирғизистон ва Тоҷикистон боз ба Агентии зидди маводи мухаддири Тоҷикистон ва пойгоҳи низомии 201-уми Русия дар Тоҷикистон низ ташриф меоранд», - афзуд Маҷидзода.