Зимни мулоқоти муовини вазири корҳои хориҷии Тоҷикистон Низомиддин Зоҳидӣ бо сафири Озарбойҷон дар Тоҷикистон Аббосалӣ Гасанов дар Душанбе вазъи кунунӣ ва дурнамои ҳамкориҳои дуҷонибаи кишварҳо мавриди баррасӣ қарор гирифтанд.

Бино ба иттилои Вазорати корҳои хориҷии ҶТ, дар ҷараёни вохӯрӣ миёни ҷонибҳо атрофи масъалаҳои ҳамкориҳои Тоҷикистон бо Озарбойҷон, аз ҷумла дар доираи Барномаи махсуси СММ барои иқтисодиёти кишварҳои Осиёи Марказӣ (SPECA) дар соли 2015 табодули назари судманд сурат гирифт.

Тибқи маълумоти Агентии омори назди президенти ҶТ, дар муқоиса бо моҳҳои январ-апрели соли гузашта тайи 4 моҳи соли равон ҳаҷми муомилоти молӣ миёни Тоҷикистону Озарбойҷон қариб 96% коҳиш ёфта, дар ин давра ҳамагӣ 595 ҳазор доллари ИМА-ро ташкил додааст, ки ин ҳаҷм пурра ба воридоти маҳсулот аз Озарбойҷон ба Тоҷикистон рост меояд.