Президенти Тоҷикистон Эмомалӣ Раҳмон раиси вилояти Ивановои Русия Павел Конковро, ки имрӯз бо сафари серӯза ба Тоҷикистон меояд, ба ҳузур мепазирад.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, вохӯрии сарвари давлати Тоҷикистон бо раиси вилояти Иваново субҳи рӯзи 22 май доир гардида, дар он масъалахои густариши ҳамкориҳои минтақаҳои Тоҷикистон бо ин вилоят баррасӣ мешаванд.

Ба иттилои манбаъ, дар мулоқот ба масоили таҳкими робитаҳои корхонаҳои нассоҷии вилояти Иваново бо пахтакорони тоҷик ва таъмини ҳимоя аз ҳуқуқу озодиҳои муҳоҷирони кории тоҷик дар ин минтақаи Русия таваҷҷуҳи хосса зоҳир хоҳад шуд.

Зимнан зикр гардид, ки рӯзи 22 май Павел Конковро ҳамчунин раиси палатаи болоии парлумони Тоҷикистон Маҳмадсаид Убайдуллоев ба ҳузур пазируфта, раиси вилояти Иванов дар доираи сафар ба Тоҷикистон аз вилояти Суғд ва Хатлон боздид ва бо раҳбарияти ин вилоятҳо низ дидору гуфтушунид мекунад.