Дар Вазорати корҳои хориҷии Тоҷикистон рӯзи 20 май брифинг доир гардид, ки дар он роҳбарону шахсони масъули намояндагиҳои дипломатӣ ва созмонҳои байнулмилалӣ бо ҷараёни омодагиҳо ба баргузории Конфронси байналмилалии сатҳи баланд роҷеъ ба натиҷаҳои татбиқи даҳсолаи байналмилалии амал «Об барои ҳаёт», 2005-2015, ки рӯзҳои 9-11 июн дар шаҳри Душанбе доир мегардад, шинос карда шуданд.

Бино ба маълумоти Вазорати корҳои хориҷии ҶТ, дар брифинг қайд шудааст, ки Конфронси мазкур бар асоси қатъномаи Созмони Милали Муттаҳид (СММ) аз 19 декабри соли 2014 таҳти унвони «Даҳсолаи байнулмилалии амал «Об барои ҳаёт», солҳои 2005-2015 ва кӯшишҳои минбаъда оид ба ноил гардидан ба рушди устувори захираҳои обӣ» баргузор шуда, дар кори он дабири кулли СММ Пан Ги Мун ширкат хоҳад варзид, ки аз муҳим будани ин чорабинӣ барои ҷомеаи ҷаҳонӣ гувоҳӣ медиҳад.

Зикр гардид, ки ҳудуди 72 ҳайати кишварҳои узви СММ ва беш аз 50 созмонҳои минтақавӣ ва байнулмилалӣ ба котиботи Конфронс иштирокашон дар ин чорабиниро тасдиқ карда, шумори то имрӯз сабтшудаи иштирокчиёни  Конфронс наздики 700 нафарро ташкил медиҳад, ки тамоми минтақаҳои ҷаҳонро намояндагӣ мекунанд.