Раиси Ҳизби наҳзати исломии Тоҷикистон, собиқ вакили палатаи поёнии парлумони ҷумҳурӣ Муҳиддин Кабирӣ айни замон дар кори конфронси байнулмилалӣ оид ба масоили муқовимат ба ифротгароӣ дар минтақаи Шарқи Наздик дар Швейтсария ширкат меварзад.

Муовини раиси ҲНИТ Маҳмадалии Ҳайит ба «Азия-Плюс» дар ин робита иттилоъ дод, ки баъд аз ин конфронс Кабирӣ аз шаҳри Берлин боздид хоҳад кард, ки дар он ҷо вохӯрии ӯ дар Вазорати корҳои хориҷии Олмон ва дар шаҳри Дортунд вохӯриаш бо диаспораи тоҷикон дар ин кишвар дар назар аст.

Ба гуфтаи ӯ, дар идома раиси ҲНИТ дар шаҳри Брюссел бо намояндагони Иттиҳоди Аврупо оид ба масоили минтақаи Осиёи Марказӣ дидору гуфтушунид мекунад.

Муовини раиси ҳизб ҳамчунин гуфт, аввали ҳафтаи оянда Муҳиддин Кабирӣ ба ватан бармегардад.

Қобили зикр аст, ки пас аз интихоботи санаи 1 марти соли ҷорӣ ба парлумон ва маҷлисҳои маҳаллии вакилони халқ дар Тоҷикистон, ки номзадҳои ҲНИТ ба парлумон ва маҷлисҳои маҳаллӣ роҳ наёфтанд, Муҳиддин Кабирӣ ба хориҷи кишвар раҳсипор шуда, муддати қариб се моҳ аз кишварҳои гуногун боздид ва дар кори анҷуману конфронсҳои сершумор иштирок кард.