Президенти Тоҷикистон Эмомалӣ Раҳмон дар робита ба даргузашти собиқ президенти Туркия Сулаймон Демирел ба президенти кунунии ин кишвар Реҷеп Тайип Эрдоган барқияи тасаллият ирсол намуд.

Бино ба иттилои хадамоти матбуоти сарвари давлат, дар барқияи Эмомалӣ Раҳмон зикр мегардад, ки «бо эҳсоси андӯҳи бузург хабари даргузашти собиқ Президенти Ҷумҳурии Туркия Сулаймон Демирелро дарёфт намудам».

«Шодравон ходими барҷастаи сиёсиву давлатӣ ва яке аз бузургтарин шахсиятҳои мамлакат буд. Мардуми Тоҷикистон имрӯз дӯсти дерина ва самимии худро аз даст дод. Маҳз дар замони раҳбарии марҳум ва ба шарофати ӯ асосҳо ва таҳкурсии муносибатҳои созандаи дуҷонибаи Тоҷикистону Туркия поягузорӣ шуда буданд. Ва ҳанӯз аз ёдҳо нарафтааст, ки Сулаймон Демирел, сарфи назар аз вазъи ноором ва вазнини кишвари мо дар солҳои аввали истиқлолият, яке аз аввалинҳо шуда ба Ҷумҳурии Тоҷикистон сафари расмӣ анҷом дода буд», - омадааст дар барқия.

Зимнан сарвари давлати Тоҷикистон аз номи Ҳукумат ва мардуми Тоҷикистон ба мардуми дӯсти Туркия ҳамдардӣ ва тасаллиёти амиқу самимии худро ба ин талафоти гарон изҳор мекунад.