Президенти Қазоқистон Нурсултон Назарбоев рӯзҳои 13-14 сентябр бо сафари расмӣ ба Тоҷикистон меояд.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, аз рӯи натиҷаҳои сафари сарвари давлати Қазоқистон ба Душанбе ва дидору гуфтушуниди ӯ бо президенти Тоҷикистон Эмомалӣ Раҳмон имзои бастаи нави асноди ҳамкориҳои дуҷониба миёни кишварҳо дар назар аст.

Ба иттилои манбаъ, дар назар аст, ки зимни гуфтушуниди сарони кишварҳои Тоҷикистону Қазоқистон масоили ҳамкориҳои дуҷонибаи иқтисодиву иҷтимоӣ ва фарҳангиву гуманитарӣ баррасӣ шуда, ҷонибҳо ҳамчунин ба масоили таъмини амният таваҷҷуҳи хоса зоҳир хоҳанд кард.

Қобили зикр аст, ки пас аз анҷоми сафари расмӣ ба Тоҷикистон Нурсултон Назарбоев рӯзи 15 сентябр дар кори нишасти сарони кишварҳои узви Созмони Аҳдномаи амнияти дастаҷамъӣ дар Душанбе иштирок мекунад.