- Дар робита ба муноқишаи рухдода дар марз бо Тоҷикистон нахуствазири Қирғизистон Темир Сариев рӯзи сешанбе аз рухсатии кӯтоҳмуҳлат бар кор баромад, - хабар дода мешавад дар сомонаи расмии ҳукумати Қирғизистон.

Дар иттилои ҳукумати ин кишвар қайд мешавад, ки бо супориши Сариев оид ба ҳаллу фасли ин муноқиша гурӯҳи кории байниидоравӣ таъсис дода шудааст.

Гуфта мешавад, гурӯҳи кории зикршуда барои ба эътидол овардани вазъ ва роҳандозии тадбирҳо ҷиҳати таъмини тартиботи ҷамъиятӣ ва амнияти шаҳрвандон ба вилояти Ботканд сафарбар шудааст.

«Айни замон намояндагони мақомоти маҳаллии ҳокимияти давлатӣ, ҳифзи ҳуқуқ ва Хадамоти сарҳдабонии Қирғизистону Тоҷикистон бо мақсади ба эътидол овардани вазъ бо аҳолии маҳаллӣ корҳои фаҳмондадиҳӣ мегузаронанд», - гуфта мешавад дар маълумот.

Ёдрас мекунем, ки рӯзи душанбеи ҳамин ҳафта дар яке аз қитъаҳои марзи Тоҷикистону Қирғизистон муноқиша сар зада, ҷонибҳо ба ҳамдигар сангпартоӣ карданд. Рӯзи 4 август низ муноқиша идома ёфт. Тибқи маълумоти гуногун, дар ин муноқиша ба сурати умум аз 200 то 500 нафар иштирок доранд. Шаҳрвандони ҳарду ҷониб ҷароҳатҳо бардоштанд.