Дар ҷаласаи Шӯрои сарони кишварҳои узви Созмони Аҳдномаи амнияти дастаҷамъӣ (СААД), ки рӯзи 15 сентябр дар шахри Душанбе доир мегардад, вазирони мудофиа ва корҳои хориҷии кишварҳои узви Созмон гирдиҳам меоянд. Дар ин бора ба «Азия-Плюс» як манбаъ аз ҳукумати ҷумҳурӣ хабар дод.

Бино ба гуфтаи манбаъ, рӯзи 14 сентябр дар Душанбе ҷаласаи муштараки Шӯрои вазирони мудофиа ва вазирони корҳои хориҷии кишварҳои узви СААД баргузор мешавад.

«Вазирони мудофиа ва корҳои хориҷии давлатҳои Арманистон, Беларус, Қазоқистон, Қирғизистон, Русия ва Тоҷикистон дар остонаи нишасти сарони кишварҳои узви Созмон масоили ҳамоҳангсозии талошҳо баҳри таъмини амният ва масоили сиёсати хориҷиро баррасӣ мекунанд», - гуфт манбаъ.

Зимнан таъкид шуд, ки дар нишасти сарони кишварҳои узви СААД дар Душанбе асосан ба масъалаҳои таъмини амният дар минтақаи Осиёи Марказӣ ва ҳамчунин вазъ дар Шарқи Наздик таваҷҷуҳ зоҳир хоҳад шуд.

Ҳамчунин хотиррасон шуд, ки дар нишасти Душанбе раёсат дар СААД аз Тоҷикистон ба Арманистон мегузарад.