Дар доираи сафари расмии рӯзи 14 сентябр пешбинишудаи президенти Қазоқистон Нурсултон Назарбоев ба Тоҷикистон ӯ аз шаҳри металлургҳои тоҷик - Турсунзода боздид мекунад.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, пас аз анҷоми гуфтушунид бо президенти Тоҷикистон Эмомалӣ Раҳмон сарвари давлати Қазоқистон ният дорад, ки ба шаҳри Турсунзода ташриф оварда, бо дастовардҳои боғпарварону металлургҳо шинос шавад.

Ба иттилои манбаъ, дар ҷараёни сафари президенти Қазоқистон ба Душанбе ва аз рӯи натиҷаҳои гуфтушуниди ӯ бо сарвари давлати Тоҷикистон имзои бастаи нави асноди ҳамкориҳои дуҷониба дар назар аст.

Интизорӣ меравад, ки зимни гуфтушунидҳои сарони кишварҳои Тоҷикистону Қазоқистон натанҳо ба масоили рушди ҳамкориҳо дар самтҳои гуногун, балки ба масоили таъмини амният низ таваҷҷуҳ зоҳир хоҳад шуд.

Қобили зикр аст, ки пас аз анҷоми сафари расмӣ президенти Қазоқистон дар кори нишасти сарони кишварҳои узви Созмони Аҳдномаи амнияти дастаҷамъӣ (15 сентябр) дар Душанбе иштирок мекунад.