Имрӯз дар Душанбе сарони кишварҳои Тоҷикистону Қазоқистон Эмомалӣ Раҳмон ва Нурсултон Назарбоев Аҳднома оид ба шарикии стратегӣ миёни Тоҷикистону Қазоқистонро ба имзо расониданд. Ба ин монанд санадро Тоҷикистон соли 2004 бо Русия ва соли 2013 бо Чин ба тасвиб расонидааст.

Аз рӯи натиҷаҳои гуфтушуниди ҳайатҳои расмии Тоҷикистону Қазоқистон дар ҳошияи сафари расмии президенти Қазоқистон ба Тоҷикистон дар шаҳри Душанбе Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба ҳамкорӣ дар соҳаи ҳимояи техникии иттилот ба тасвиб расид.

Ғайр аз ин, миёни Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Вазорати фарҳанг ва варзиши Ҷумҳурии Қазоқистон оид ба ҳамкорӣ дар соҳаи варзиш ва тарбияи ҷисмонӣ созишнома ба имзо расид.

Миёни Вазоратҳои корҳои хориҷии Тоҷикистон ва Қазоқистон Барномаи ҳамкорӣ барои солҳои 2016-2017 ба тасвиб расид.

Ҳамчунин оид ба ворид намудани тағйиру иловаҳо ба Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба фаъолияти меҳнатӣ ва ҳифзи ҳуқуқи муҳоҷирони меҳнатӣ - шаҳрвандони Тоҷикистон, ки муваққатан дар ҳудуди Ҷумҳурии Қазоқистон кор мекунанд ва фаъолияти меҳнатӣ ва ҳифзи ҳуқуқи шаҳрвандони Қазоқистон, ки муваққатан дар ҳудуди Тоҷикистон кор мекунанд, аз 4 майи соли 2006 Протокол ба имзо расид.

Ҷонибҳо ҳамчунин Протокол оид ба ворид намудани тағйиру иловаҳо ба Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон оид ба ҳамкорӣ дар соҳаи маориф аз 13 июни соли 200-ро низ ба имзо расониданд.