Президенти Русия Владимир Путин шоми рӯзи 14 сентябр ҷиҳати иштирок дар кори ҷаласаи Шӯрои сарони кишварҳои узви Созмони Аҳдномаи амнияти дастаҷамъӣ (СААД) ба шаҳри Душанбе ташриф овард.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар фурудгоҳи байнулмилалии Душанбе Владимир Путинро нахуствазири Тоҷикистон Қоҳир Расулзода ва дигар шахсони расмӣ пешвоз гирифтанд.

Имрӯз мулоқоти сарони кишварҳои Тоҷикистону Русия Эмомалӣ Раҳмон ва Владимир Путин дар назар буда, дар он масоили марбут ба ҳамкориҳои дуҷониба дар бахшҳои гуногун ва ҳамчунин дигар масоили мавриди таваҷҷуҳи тарафайн баррасӣ мешаванд.

Ёдрас мекунем, ки ҷиҳати иштирок дар кори ҷаласаи Шӯрои сарони кишварҳои узви СААД сарони ҳамаи кишварҳои узви Созмон - Арманистон, Беларус, Қазоқистон, Қирғизистон ва Русия ба Душанбе ташриф оварданд. Ҳамчунин вазирони корҳои хориҷӣ ва мудофиаи ин кишварҳо низ дар пойтахти Тоҷикистон қарор доранд.