Имрӯз Президенти Ҷумҳурии Тоҷикистон Эмомалӣ Раҳмон барои иштирок дар иҷлосияи 70-уми Маҷмаи Умумии Созмони Милали Муттаҳид ба шаҳри Ню-Йорк сафар кард.

Бино ба иттилои хадамоти матбуоти сарвари давлат, дар ин сафар Эмомалӣ Раҳмонро вазири корҳои хориҷӣ Сироҷиддин Аслов, ёвари президенти ҶТ оид ба масъалаҳои робитаҳои хориҷӣ Эркинхон Раҳматуллозода ва дигар шахсони расмӣ ҳамроҳӣ мекунанд.

Интизорӣ меравад, ки дар ҳошияи нишасти СММ оид ба рушди устувор дар Ню-Йорк яке аз чорабиниҳо таҳти раёсати Эмомалӣ Раҳмон баргузор хоҳад шуд.

Ҳамоҳангсози доимии СММ дар Тоҷикистон Александр Зуев қаблан дар мусоҳиба ба Радиои СММ дар ин робита изҳор намуда буд , ки дар ҳошияи нишасти СММ оид ба рушди устувор дар Ню-Йорк таҳти раёсати президенти Тоҷикистон Эмомалӣ Раҳмон ва нахуствазири Таиланд Ниваттхумронга Бунсонгпайсан рӯзи 27 сентябр чорабинии сатҳи баланд доир мегардад.

Ба гуфтаи ӯ, ин чорабинӣ ба рушди ҳамкорӣ дар соҳаи об, мушкилоти истифодаи об, маҷроҳои фаромарзии об ва дигар паҳлӯҳои масъалаҳои марбут ба об бахшида хоҳад шуд.