Намояндагони Комиссияи марказии интихобот ва раъйпурсӣ (КМИР)-и Тоҷикистон ҷиҳати иштирок ба сифати нозирон дар маъракаи интихоботи президенти Беларус, ки ба санаи 11 октябр таъин шудааст, субҳи имрӯз ба шаҳри Минск раҳсипор шуданд.

Тавре ба «Азия-Плюс» як манбаъ аз КМИР Тоҷикистон дар ин робита иттилоъ дод, аз Тоҷикистон ба ин маърака ба сифати нозирон аз миссияи Кумитаи иҷроияи ИДМ муовини раиси КМИР Саидбой Зокиров ва роҳбари дастгоҳи КМИР Абдуманнон Додозода шомил гардидаанд.

Ғайр аз ин, рӯзи 9 октябр вакили палатаи поёнии парлумони Тоҷикистон Нурулло Оқилзода ва муовини раиси ҲХДТ Асрор Латифзода низ ба сифати нозирон аз Тоҷикистон дар маъракаи интихоботи президенти Беларус ба Минск мераванд.

Бино ба маълумоти ВАО-и Беларус, рӯзи сешанбе, 6 октябр овоздиҳии пешакӣ дар маъракаи интихоботи президенти Беларус оғоз гардидааст, ки то 10 октябр идома меёбад.

Маъракаи интихоботи президенти Беларус рӯзи якшанбе, 11 октябр доир мегардад. Президенти амалкунандаи ин кишвар Александр Лукашенко, намояндаи ширкати «Говори правду» Татяна Короткевич, Атамани олии «Белорусское казачество» Николай Улахович ва раиси Ҳизби либералӣ-демократии Беларус Сергей Гайдукевич ба сифати номзадҳо ба мансаби президентӣ сабти ном шудаанд.