Дар анҷоми сафари корӣ ба вилояти Суғд Президенти тоҷикистон Эмомалӣ Раҳмон дар барномаи Фестивали вилоятии «Атлас ва адраси тоҷик - 2015» дар Қасри Арбоби ноҳияи Бобоҷон Ғафуров иштирок кард.

Бино ба иттилои хадамоти матбуоти сарвари давлат , пеш аз иштирок дар чорабинӣ бахшида ба иди атласу адрас президенти мамлакат оромгоҳи қаҳрамони меҳнат Саидхуҷа Урунхоҷаевро зиёрат кард.

Президент ба маҳсули кори дастони ҳунармандон баҳои баланд дод. 9 нафар тарроҳ аз шаҳру ноҳияҳои вилояти Суғд либосҳои миллиро, ки аз навъҳои гуногуни атласу адрас духта шуда буданд, пешниҳоди ҳозирин намуданд. Дар ин ҳамоиш тарроҳон аз 30 номгӯ матоъи гуногуни атласу адрас куртаҳоро бо тарҳи милливу ҳозиразамон духта, пешкаши аҳли нишаст карданд.

Зикр гардид, ки айни замон дар вилояти Суғд 80 маркази атласу адрасбофӣ бунёд ёфтааст ва то охири сол ин шумора бояд ба 150 адад расонида шавад. Айни ҳол  наздики 600 нафар занону духтарон ба ҳунаромузӣ ҷалб гаштаанд, ки дар муддати кӯтоҳ ҳамчун мутахассис бо ҷойи кори доимӣ таъмин мегарданд.

Дар охири барномаи рангини ҳунарӣ, ки таърихи рушди санъати атлас ва адрасбофиро тавассути саҳнаҳо инъикос менамуд, аз руи шартҳои озмун, аз ҷумла беҳтарин атласи Гули бодом, беҳтарин либоси кудакона,  беҳтарин либоси рӯзмарраю расмӣ, беҳтарин либоси қадима ва беҳтарин адрас  ғолибон муайян шуданд. Ба иштирокчиёни муваффақ ва ғолиб барои бофтани атласу адраси хушсифат ҷоизаҳо дар ҳаҷми 10 ва 8 ҳазор сомонӣ муайн карда шуда буд, ки онро Президенти мамлакат Эмомалӣ Раҳмон дар вазъияти тантанавӣ тақдим кард.

Президенти мамлакат ҳамчунин пешниҳод намуд, ки фестивали атласу адрас минбаъд дар сатҳи вилоятӣ не, балки дар саросари ҷумҳурӣ гузаронида шавад.