Машваратҳои сиёсӣ миёни Вазоратҳои корҳои хориҷии Тоҷикистону Ӯзбекистон, ки рӯзҳои 17-18 декабр пешбинӣ шуда буданд, бо розигии тарафҳо ба ҳафтаи оянда мавқуф гузошта шуд.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, сабаби ба таъхир афтодани машваратҳо бештар дақиқу саҳеҳтар омода кардани рӯзномаи вохӯрии муовинони вазирони корҳои хориҷии кишварҳо будааст.

Ба иттилои манбаъ, машваратҳои сиёсӣ миёни Вазоратҳои корҳои хориҷии Тоҷикистону Ӯзбекистон, ки нахустин вохӯрии чунин сатҳ байни намояндагони кишварҳо мебошад, санаи 24 декабр дар шаҳри Душанбе баргузор мешавад.

Ҳайати ҷонибҳоро дар ин чорабинӣ муовинони вазирони корҳои хориҷи кишварҳо Парвиз Давлатзода (Тоҷикистон) ва НиёзХоҷаев (Ӯзбекистон) роҳбарӣ мекунанд.

Дар машваратҳо баррасии масоили муҳиму рӯзмарраи мавриди таваҷҷуҳи тарафайн, аз ҷумла масоили рушди муносибатҳо миёни Душанбе ва Тошканд дар бахшҳои иқтисоду тиҷорат ва нақлиёту коммуникатсия дар назар буда, миёни ҷонибҳо ҳамчунин атрофи мушкилоти глобалии минтақаи Осиёи Марказӣ, ИДМ, вазъ дар Шарқи Наздик ва Афғонистон табодули назар сурат мегирад.

Муносибатҳои дипломатӣ миёни Тоҷикистону Ӯзбекистон 22 октябри соли1992 роҳандозӣ шуданд. Санадҳои асосии танзимкунандаи самтҳои асосии муносибатҳо миёни кишварҳо Шартномаи баимзорасида дар Тошканд 4 январи соли 1993 дар бораи дӯстӣ, ҳамҷаворӣ ва ҳамкорӣ ва Созишнома дар бораи дӯстии абадӣ миёни давлатҳо аз 15 июни соли 2000 мебошанд.