Президенти Тоҷикистон Эмомалӣ Раҳмон дар кори иҷлосияи Шӯрои амнияти дастаҷамъии Созмони Аҳдномаи амнияти дастаҷамъӣ (СААД), ки санаи 21 декабр дар Маскав доир мегардад, иштирок мекунад.

Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, дар доираи иштироки Эмомалӣ Раҳмон дар кори иҷлосияи мазкур дидору гуфтушуниди ӯ бо президенти Русия Владимир Путин дар назар аст.

Дар нишасти СААД сарони кишварҳои Русия, Арманистон, Беларус, Қазоқистон, Қирғизистон ва Тоҷикистон ширкат меварзанд.

Дар ҷараёни чорабинии мазкур баррасии масоили калидии таҳкими суботу амнияти минтақавӣ, муқовимати пурсамар ба тероризми байнулмилалӣ ва дигар масъалаҳои мавриди таваҷҷуҳи иштирокдорони иҷлосия ба нақша гирифта шудааст.