Вазири корҳои хориҷии Тоҷикистон Сироҷидин Аслов рӯзи 4 феврали соли 2016 муовини Дабири кулли Созмони Милали Муттаҳид, Котиби иҷроияи Комиссияи иқтисодию иҷтимоии СММ барои кишварҳои Осиё ва Уқенуси Ором (ЭСКАТО) хонум Шамшод Ахтарро ба ҳузур пазируфт.

Бино ба иттилои Вазорати корҳои хориҷии ҶТ, зимни мулоқот масъалаҳои марбут ба ҳамкории Тоҷикистон ва ЭСКАТО, аз ҷумла, масъалаҳои таҳкими ҳамкориҳои  минтақавӣ  дар соҳаи нақлиёт, ҳамгироӣ ва ҳампайвандии кишварҳо дар минтақаи Осиё ва Уқёнуси Ором мавриди муҳокима қарор гирифтанд.

Гуфта мешавад, ҳамзамон ҷонибҳо оид ба омодагӣ ҷиҳати баргузории Муколамаи роҳбарони  кишварҳои Осиёи шимолӣ ва марказии маҳсур дар хушкӣ, ки 17 майи соли равон дар Бангкок дар чаҳорчӯбаи  Ҷаласаи 72-юми ЭСКАТО  ба нақша гирифта шудааст, мубодилаи афкор намуданд.