Иттиҳоди Аврупо (ИА) изҳор медорад, ки аз посухҳои ҳукумати Тоҷикистон дар мавриди амалҳои террористии 4 сентябр, ки ба манъи фаъолияти Ҳизби наҳзати исломии Тоҷикистон боис гардид, нигарон аст.

Дар изҳороти мунташиршудаи Иттиҳоди Аврупо зикр мегардад, ки дар пайи ин рӯйдод бисёре аз аъзои ҲНИТ ҳабс ва бидуни кафолати суди мунсифона ба ҷавобгарии ҷиноятӣ кашида шуданд.

Дар изҳорот қайд мешавад, ки ҲНИТ дар рӯйхати созмонҳои байнулмилалии террористӣ ҷой надорад.

Ҳамчунин Иттиҳоди Аврупо аз ҳабси адвокатҳо Бузургмеҳр Ёров, Нодир Додоҷонов ва Нуриддин Маҳкамов, ки аз манфиатҳои аъзои боздоштшудаи ҲНИТ ҳимоят мекарданд, низ нигаронӣ изҳор намудааст.

«Мо муҳим будани риояи қонунҳоро тасдиқ намуда, ҳукумати Тоҷикистонро ба таъмини тафтиши боадолатона ва шаффофи парвандаҳои ҷиноӣ нисбати аъзои боздштшудаи ҲНИТ ва адвокатҳои онҳо мутобиқи уҳдадориҳои байнулмилалӣ даъват мекунем. Иттиҳоди Аврупо ҳукумати Тоҷикистонро дар иҷрои уҳдадориҳои байнулмилалиаш дар доираи САҲА дастгирӣ карданист», - гуфта мешавад дар изҳорот.