Вазири корҳои хориҷии Тоҷикистон Сироҷиддин Аслов рӯзи 31 март сафири Қазоқистон Агибай Смагуловро бинобар анҷом ёфтани маъмурияти дипломатияш дар Тоҷикистон ба ҳузур пазируфт.

Бино ба иттилои Вазорати корҳои хориҷии ҷумҳурӣ, зимни сӯҳбат раванди рушди муносибатҳои Тоҷикистон ва Қазоқистон баланд арзёбӣ гардид ва изҳори умед карда шуд, ки ҳамкориҳои стратегии Тоҷикистону Қазоқистон дар арсаҳои мухталиф густариши бештар хоҳанд ёфт.

Вазири корҳои хориҷӣ ба сафир А.Смагулов барои фаъолияти пурсамари дипломатияш дар Тоҷикистон изҳори сипос намуд.

Ҳамчунин ҳамин рӯз вохӯрии муовини вазири корҳои хориҷии Тоҷикистон Маҳмадшариф Ҳақдод бо сафири Туркманистон дар Тоҷикистон Чорӣ Атаев доир гардида, зимни мулоқот ҷонибҳо вазъ ва дурнамои рушди робитаҳои дуҷониба дар соҳаҳои сиёсӣ, тиҷоратӣ-иқтисодӣ ва фарҳангӣ-гуманитариро мавриди муҳокима қарор доданд.

Гуфта мешавад, ҳавасмандии ҷонибҳо перомуни таҳкими ҳамкориҳо дар соҳаҳои мухталифи мавриди таваҷҷуҳи тарафайн изҳор гардид.