Дар маъракаи раъйпурсии умумихалқӣ, ки санаи 22 май дар Тоҷикистон доир гардид, аксари кулли овоздиҳандагон ҳамаи 40 тағйиру иловаҳои пешниҳодшуда ба Конститутсияи ҷумҳуриро дастгирӣ намуданд.

Аз ҷумла ба моддаи 28 Конститутсия тағйирот ворид шуд. Дар ин модда қаблан зикр шуда буд: «Шаҳрванд ҳақ дорад дар ташкили ҳизбҳои сиёсӣ, аз ҷумла ҳизбҳои характери демократӣ, динӣ ва атеистӣ дошта, иттифоқҳои касаба ва дигар иттиҳодияҳои ҷамъиятӣ иштирок намояд, ихтиёран ба онҳо дохил ва аз онҳо хориҷ гардад».

Ин модда баъди раъйпурсӣ чунин шакл хоҳад дошт: «Шаҳрванд ҳуқуқ дорад дар ташкили ҳизбҳои сиёсӣ, иттифоқҳои касаба ва дигар иттиҳодияҳои ҷамъиятӣ иштирок намояд, ихтиёран ба онҳо дохил ва аз онҳо хориҷ гардад».

Мо кӯшиш кардем, ки дар робита ба хориҷ шудани калимаи «атеистӣ» аз моддаи 28 бифаҳмем, ки оё ин ба манъи Ҳизби коммунисти Тоҷикистон таҳдид намекунад ва барои рӯшанӣ андохтан ба масъала ба котиби Ҳизби коммунисти Тоҷикистон Исмоил Талбаков муроҷиат кардем.

«Ҳизби коммунист ҳизби сиёсии атеистӣ набуда, ҳизбе мебошад, ки ҷонибдори адолати иҷтимоӣ аст. Ҳанӯз соли 1990 мо аз Оинномаи Ҳизби коммунисти Тоҷикистон калимаи «атеизм» ва тамоми чизҳои марбут ба ин мафҳумро хориҷ карда будем», - гуфт ӯ.

Дар идома котиби ҲКТ изҳор намуд, ки мутобиқи Оинномаи амалкунандаи Ҳизби коммунист, ҳамаи шаҳрвандони аз сини 18-сола болои Тоҷикистон сарфи назар аз мансубияташон ба миллату мазҳаб, маълумоту мақоми иҷтимоӣ ва ғайра метавонанд аъзои Ҳизби коммунисти кишвар бошанд.

«Оинномаи Ҳизби коммунисти Тоҷикистон ба масҷид рафтану намоз хондани аъзои ҳизб, сафар барои адои маросими ҳаҷ, рӯза доштан ва анҷом додани дигар расму оинҳои диниро манъ намекунад», - таъкид дошт Талбаков.