Тайи ду ҳафтаи ахир ҳукуматдорони Туркия ҳудуди 140 нафар зодагони минтақаи Осиёи Марказиро, ки дар қаламрави ин кишвар ҳузур доштаанд, боздошт карданд.

Бино ба иттилои хабаргузории «Фергана» бо истинод ба «Озодлик» (хадамоти ӯзбекии Радиои Озодӣ), мақомоти амнияти шаҳри Истамбул беш аз 100 нафар шаҳрвандони кишварҳои Осиёи Марказиро боздошт намуда, қисмате аз онҳо озод ва чандеро бо шарти тарк кардани қаламрави Туркия дар муддати 1 моҳ раҳо кардаанд.

Гуфта мешавад, айни замон дар маркази будубоши муваққатии шаҳрвандони хориҷиии мавзеи Кумкаппаи Истамбул 60 нафар шаҳрвандони кишварҳои Осиёи Марказӣ нигаҳдорӣ мешаванд, ки 4 тан аз онҳо - шаҳрвандони Тоҷикистон, 6 нафар - шаҳрвандони Қирғизистон, 9 нафар - аз Русия, 1 нафар - аз Қазоқистон ва боқимонда ӯзбекҳо мебошанд.

Пешвои Ҳаракати мардумии Ӯзбекистон Муҳаммад Солеҳ гуфтааст, миёни 60 нафари дар марказ қарордошта, 4 нафар занони ҳомиладор, 17 нафар кӯдакон, аз ҷумла тифлони 2-ҳафтаинаву 3-моҳа низ ҳузур доранд.

Ҳамчунин зикр мегардад, ки боздошти зодагони кишварҳои минтақаи Осиёи Марказӣ танҳо дар шаҳри Истанбул сурат мегирад.

Дар ҳамин ҳол, бино ба иттилои хадамоти тоҷикии Радиои Озодӣ , дар пайи як амалёти мақомоти интизомии Туркия, рӯзи 29-уми июл наздики 140 муҳоҷир аз кишварҳои Осиёи Марказӣ дастгир шудаанд, ки дар миёни онҳо ҳашт тан шаҳрвандони Тоҷикистон низ ҳастанд.

Зикр мегардад, ки бори аввал аст, ки Туркия бидуни дархости Тоҷикистон муҳоҷирони меҳнатии ин кишварро мехоҳад, аз хокаш берун кунад.

Ҳамчунин гуфта мешавад, сафорати Тоҷикистон дар Туркия дар бораи боздошти тоҷикон ва эҳтимоли ихроҷашон то ҳанӯз изҳори назар накардааст.