Президенти Тоҷикистон Эмомалӣ Раҳмон Раиси Маҷлиси миллии Арманистон Ара Баблоянро ба ҳузур пазируфт.

Бино ба иттилои хадамоти матбуоти сарвари давлат, дар суҳбати самимӣ аз сатҳу сифати ҳамкориҳои гуногунҷанбаи Тоҷикистон ва Арманистон, хусусан равобити байнипарлумонӣ ва муколамаи доимии сиёсии сатҳи баланд дар давоми 25 соли барқарории муносибатҳои байнидавлатӣ изҳори қаноатмандӣ карда шуд.

Тавре таъкид гардид, иҷрои мувофиқаҳои дар ҷараёни сафари расмии Президенти Тоҷикистон ба Арманистон дар моҳи июни соли равон бадастомада, заминаи мусоид ва имконияти фарохеро барои рушуду тавсеаи бештари муносибатҳои байнидавлатии манфиатбор фароҳам меоварад.

Дар ҳамин робита изҳори умедворӣ карда шуд, ки сафари Раиси Маҷлиси миллии Ҷумҳурии Арманистон Ара Баблоян ба Ҷумҳурии Тоҷикистон низ ба рушду тавсеаи ҳамкориҳои байнидавлатӣ ва байнипарлумониии Тоҷикистону Арманистон такони тоза мебахшад.

Ҷонибҳо оид ба тақвияти ҳамкориҳои байнидавлатӣ дар соҳаҳои иқтисоду тиҷорат, илму фарҳанг ва равобити байнипарлумонию ҷамъиятӣ ҳам дар асоси дуҷониба ва ҳам дар доираи СММ, САҲА, ИДМ ва СААД фикру мулоҳизаҳои судманд баён намуданд.

Мусоҳибон таъкид намуданд, ки заминаи ҳуқуқию қарордодии муносибатҳои байнидавлатиро беш аз 30 санад ташкил медиҳад, ки ҳамкориҳои ду давлатро дар соҳаҳои гуногун ба танзим медароранд.

Мавқею назари ҳамсон ва ё наздики ду давлат дар бисёр масъалаҳои мубрами ҷаҳони муосир низ таъкид карда шуд.

Вобаста ба ҳалли масъалаҳои амниятӣ, аз ҷумла муборизаи муштарак бо таҳдиду хатарҳои ҷаҳони муосир, ҳамчунин масъалаи таҳкими ҳифзи марзи давлатӣ ва роҳҳои ҳалли сулҳомези муноқишаҳои сиёсӣ дар кишварҳои олам мавриди муҳокима қарор дода шуд.