Вазири корҳои хориҷии Русия Сергей Лавров изҳор доштааст, ки  масоили пайвастани Тоҷикистон ба Иттиҳоди иқтисодии Авруосиё (ИИАО) баррасӣ мешавад.

Бино ба иттилои сомонаи хабаргузории Sputnik Тоҷикистон, ин мансабдорои баландпояи Русия гуфтааст, кишвараш аз пайвастани Озарбойҷон ба Иттиҳоди иқтисодии Авруосиё истиқбол хоҳад кард.

«Ин як иттиҳоди бози интегролӣ аст ва аз пайвастани кишварҳои нав ҳамеша истиқбол хоҳанд кард. Дар ҳоли ҳозир имконоти пайвастани Тоҷикистон ба ин созмон баррасӣ мешавад», — гуфтааст ӯ дар дидор бо донишҷӯёни донишгоҳи дипломатии шаҳри Боку.

Гуфта мешавад, бино ба гузоришҳои расонаҳои хабарии Русия ва Озарбойҷон, Сергей Лавров зикр кардааст, ки "бисёре аз кишварҳои ҷаҳон хостори роҳандозии равобити ҳамкорӣ бо ин иттиҳод ҳастанд".

Вазири корҳои хориҷии Русия ҳамчунин қайд кардааст, ки, "кишварҳое дар навбат истодаанд, то дар мавриди минтақаи озоди бозаргонӣ тавофуқ кунанд».

«Иттиҳоди Аврупо аз роҳандозии иртибот бо ИИАО худдорӣ мекунад. Онҳо худро муҷозот мекунанд, мо низ аз ин бурд нахоҳем кард. Набояд барои рақобат бо дигарон бошгоҳҳои пӯшида иҷод кард», - иброз доштааст Лавров.