Вазири корҳои хориҷии Тоҷикистон Сироҷидин Аслов бо  муовини вазири корҳои хориҷии Умон  Муҳаммад Ал-Зарафӣ дидору гуфтушунид кард.

Бино ба иттилои Вазорати корҳои хориҷии ҶТ, мулоқот дар остонаи Конфронси байналмилалии сатҳи баланд « Муқовимат  бо терроризм ва ифротгароии хушунатомез» дир гардид, ки имрӯз дар Душанбе ба кор шурӯъ мекунад.

Гуфта мешавад, зимни вохӯрӣ ҷонибҳо алоқамандии самимии хешро ба таҳкиму тавсеаи ҳамкориҳои дуҷонибаи сиёсӣ, иқтисодию  тиҷоратӣ ва фарҳангию башарӣ баён намуданд.

Ҳамзамон таъкид гардид, ки ҷиҳати фаъол намудани равобити судманд, танзими табодули сафарҳо дар сатҳҳои гуногун ва ҳамкории намояндагиҳои дипломатии ду кишвар мувофиқи мақсад мебошад.

Ҷонибҳо масъалаҳои рушди ҳамкориҳои мутақобилан судмандро дар соҳаҳои иқтисод, энергетика, нақлиёт, сармоягузорӣ, туризм баррасӣ намуда, ба зарурати тақвияти пояи шартномавию ҳуқуқӣ миёни ду кишвар таъкид намуданд.