Дар интихоботи рӯзи 1-уми март ба палатаи поёнии парлумони Тоҷикистон дар ҳавзаи нитихоботии №38-и Муъминобод раиси Ҳизби коммунисти Тоҷикистон (ҲКТ) Меҳроҷ Абдуллоев ғолиб шуд. Дар ин бора ба “Азия-Плюс” аз ҳавзаи интихоботии мазкур хабар доданд.

Дар ин ҳавзаи интихоботӣ 5 номзад рақобат карданд, ки сетои онҳо аз Ҳизби халқии демократии Тоҷикистон буданд. Ба ҷонибдории Меҳроҷ Абдуллоев наздики 65%-и интихобкунадагон овоз доданд.

Ёдрас мекунем, ки дар маъракаи интихоботии аввали баҳори соли 2015 бори нахуст дар таърих Ҳизби коммунисти Тоҷикистон аз рӯйхати ҳизбӣ ба парлумон роҳ наёфта, ин нокомӣ боиси ивази пешвои он гардид.

Пас аз пошхӯрии Иттиҳоди Шӯравӣ ва ба соҳибистиқлолӣ расидани Тоҷикистон аз сентябри соли 1991 то июли соли 2016 сиёсатмадори маъруфи тоҷик Шодӣ Шабдолов билоиваз Ҳизби коммунистро роҳбарӣ кард.

Моҳи июли соли 2016 Исмоил Талбаков раиси Ҳизби коммунисти Тоҷикистон интихоб шуда, моҳи декабри ҳамон сол аз олам даргузашт.

Меҳроҷ Абдуллоев 22-юми апрели соли 2017 раиси ҲКТ интихоб шуд. Ӯ пешвои сеюми Ҳизби коммунисти Тоҷикистони соҳибистиқлол аст.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.