Вазири корҳои дохилии Тоҷикистон Рамазон Раҳимзода имрӯз маълумоти чанде аз ВАО-и Эронро дар бораи аз ҷониби Душанбе ба Теҳрон истирдод кардани Ҷамшед Шормаҳд, мухолифи фаъоли ҳукумати Эрон рад кард.

“Мо ҳам дар ин бора аз ВАО хабардор шудем ва ман дар ин робита метавонам бигӯям, ки нимсолаи аввал на аз Тоҷикистон ба Эрону на аз ин кишвар ба Тоҷикистон ягон касе истирдод нашудааст”, - изҳор дошт вазир.

Ба гуфтаи ӯ, айни замон ҳудуди 5 ҳазор нафар шаҳрвандони Тоҷикистон барои даст доштан дар ҷиноятҳои вазнин мавриди ҷустуҷӯи байнулмилалӣ эълон шуда, давоми шаш моҳи соли ҷорӣ наздики 1 ҳазор нафари онҳо боздошт шудаанд.

Тибқи маълумоти ВАО-и Эрон, Ҷамшед Шормаҳд роҳбари гурӯҳи “Тундар” аст, ки ҳукумати Эрон онро “террористӣ” номида, ба даст доштан дар даҳҳо таркишу кушторҳо дар Эрон айбдор медонад.

Газетаи эронии “Ҷавон” дар шумораи навбатии худ хабар дод, ки Ҷамшед Шормаҳд рӯзи 31 июл дар Тоҷикистон ба ҳабс гирифта шуда, сипас ба ихтиёри ҳукумати Эрон супурда шудааст.

Маълумот дар бораи боздошти Ҷамшед Шормаҳд рӯзи 1 август нашр шуда буд.

Дар ҳамин ҳол, бино ба иттилои Радиои Озодӣ, дар баёнияи дафтари матбуоти Вазорати иттилотии Эрон омадааст, ки "ҳар гуна гумонзаниҳои матраҳшуда дар расонаҳо дар бораи шеваи боздошти Ҷамшед Шормаҳд такзиб мешавад".

Гуфта мешавад, Вазорати иттилооти Эрон ҳамчунин ба хабарҳо дар бораи боздошти раҳбари гурӯҳи "Тундар" дар Тоҷикистон ишора карда ва гуфтааст, ки "ин хабарро шадидан рад мекунад".

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.