Фарҳод Раҳимӣ, Президенти Академияи миллии илмҳо (АМИ)-и Тоҷикистон дар як матлабе, ки онро хабаргузории расмии Тоҷикистон “Ховар” нашр кардааст, гуфтааст, ки “ҷилави тақдири миллат дар дасти Эмомалӣ Раҳмон аст”.

Дар ин матлаб, ки “Эҳёи саразми бостон – эҳдои хиради Пешво” унвон дорад, Фарҳод Раҳимӣ аз саҳму талошҳои Президенти Тоҷикистон Эмомалӣ Раҳмон дар ҷашнгирии 5500-солагии Саразм, шаҳри қадимае дар канори шаҳри Панҷакенти Тоҷикистон ситоиш мекунад, ки дар аввали сентябр  аз он таҷлил шуд.

Президенти Фарҳангистони Тоҷикистон бо ишора ба нақши Исмоили Сомонӣ дар таърихи тоҷикон аз донишманде иқтибос овардааст: “мардони бузурги таърих сарнавишти миллатҳоро таъйин мекунанд”. Ба дунболи ин Раҳимӣ навиштааст, ки “дар айёми тақдирсозу масъулиятбори истиқлол чунин як ҷавонмарди шуҷоъ ва хайрхоҳу поктинат Эмомалӣ Раҳмон ҷилави тақдири миллатро ба даст гирифт. Ин абармарди олами сиёсат бо хиради волою матонату иродати беназири хеш тавонист аркони истиқлоли тоҷиконро чунон устувору пойбарҷой намояд, ки дигар ҳаргиз «аз боду борон наёбад газанд”.

Дар ин матлаб Раҳимӣ Эмомалӣ Раҳмонро “ҷавонмарди табиатан фарҳангӣ” номида ва гуфтааст, ки “ба таърихи миллат таваҷҷуҳи махсусу ҳамешагӣ доранд”.  Президенти Академияи улум  ба нақши президенти кишвар дар ҷашнгирии 5500-солагии Саразм таъкид карда навиштааст, ки “Пӯшида нест, ки кашфи Саразм ва оғози ҳафриёти он ба давраи то истиқлол (аниқтараш ба соли 1976) рост омадааст, вале ҳамагон гувоҳем ва воқеияти бебаҳс он аст, ки ҳафриёти бовусъат ва ҳадафмандонаву натиҷабори ин мавзеи бостонӣ ба даврони Истиқлолияти давлатии ҷумҳурӣ пайванд мебошад ва ташаббускори асосии эҳёи Саразм ва фарогир гаштани ҳафриёти он маҳз Сарвари давлат муҳтарам Эмомалӣ Раҳмон мебошанд”.

Фарҳод Раҳимӣ дар ин матлабаш гуфтааст, ки саҳму талошҳои Эмомалӣ Раҳмон дар ҳафриёту ҷашнгирии Саразм ниёз ба таълифи як китоби ҷудогона дорад ва ниҳоди таҳти раҳбарии ӯ ин китобро ҳатман нашр мекунад: “Сарвари давлати мо эҳёгар, ривоҷбахш, ғамхор ва посдори садоқатманду устувори Саразми бостонианд ва ба ин як пора марзи нодиру ифтихорангези Тоҷикистони азиз муҳаббату эҳтироми самимӣ доранд. Месазад, ки дар бораи корномаи Пешвои миллат ҳамбаста ба эҳёву омӯзишу таҳқиқу арҷгузории Саразми бостонӣ китобе таҳия ва ба чоп расонида шавад ва ин корро олимони Академияи миллии илмҳои Тоҷикистон ҳатман ба сомон хоҳанд расонд”.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.