Имрӯз, 7-уми октябр, Эмомалӣ Раҳмон, президенти Тоҷикистон ҳамтои руси худ Владимир Путинро, ки 70-сола шуд, бо ирсоли барқия бо зодрӯзаш табрик намуд, хабар медиҳад сомонаи президенти Тоҷикистон.

Дар барқияи Эмомалӣ Раҳмон аз Владимр Путин “ҳамчун сарвари қавӣ, хирадманд ва матинирода” тавсиф шуда, таъкид гардидааст, ки “мехоҳам саҳми беандозаи Шуморо дар кори рушд ва шукуфоии Россия, инчунин таҳкими мавқеи он дар арсаи байналмилалӣ зикр намоям”.

“Хизматҳои муҳими Шумо дар таъмиқи муназзами муносиботи дӯстӣ ва ҳамкории гуногунҷанбаи Тоҷикистон ва Россия қобили баҳои баланданд. Мо ба сатҳи бадастомадаи муносибатҳои шарикии стратегӣ бо Россияи ба мо наздик арҷ мегузорем ва дар оянда барои густариши самтҳои ҳамкории мутақобилан судманди ду кишвар бар нафъи мардумонамон тамоми кӯшиши заруриро ба харҷ медиҳем”, - гуфта шудааст дар барқия.

Дар идома Эмомалӣ Раҳмон ба Владимир Путин “саломатии бардавом, саодатмандӣ, умри дароз ва дастовардҳои нав баҳри рифоҳи Россияи дӯст, ба мардуми он  — сулҳу амонӣ ва пешрафти устувор” таманно намудааст.

Гуфтан ба маврид аст, ки ду рӯз қабл Эмомалӣ Раҳмон низ худ зодрӯз дошт ва ӯро ҳамтоёнаш, аз ҷумла Владимир Путин тадрик намуданд.

Владимир Путин ба муносибати 70-солагии Эмомалӣ Раҳмон ба ӯ ордени “Барои хизмат дар назди Ватан” дараҷаи 3 тақдим намуд.

Дар Telegram, Facebook, Instagram, OK ва ВК бо мо бимонед.