Ваколати Ҷон Марк Поммершайм, сафири ИМА дар Тоҷикистон ба  охир расидааст ва ӯ ба ин муносибат бо Сироҷиддин Муҳриддин, вазири корҳои хориҷии Тоҷикистон мулоқот кардааст. Дар ин бора ВКХ Тоҷикистон хабар медиҳад.

Манбаъ менависад, ки вохӯрӣ, имрӯз, 28-уми ноябри соли 2022 сурат гирифтааст ва дар он “ҷонибҳо ҳолати кунунӣ ва дурнамои рушди муносибатҳои дуҷониба ва бисёрҷонибаи Тоҷикистон ва Иёлоти Муттаҳидаро дар самтҳои сиёсӣ, иқтисодӣ, илмию фарҳангӣ, тандурустӣ ва маориф мавриди баррасӣ қарор доданд”.

Сироҷиддин Муҳриддин ба Ҷон Марк Поммершайм барои саҳми ӯ дар таҳкими муносибатҳои дӯстӣ миёни Тоҷикистон ва ИМА изҳори миннатдорӣ намудааст.

Ёдовар мешавем, ки Ҷон Марк Поммершайм 18-уми  сентябри соли 2018 аз сӯи Доналд Трамп президенти вақти ИМА сафири ин кишвар дар Тоҷикистон таъйин гардида буд. Ӯ 22-юми феврали соли 2019 савганд ёд кард ва 11-уми  марти соли 2019 ба Тоҷикистон омад. Рӯзи 15-уми  марти соли 2019 Поммершайм эътиборномаи худро ба Эмомалӣ Раҳмон, президенти Тоҷикистон супорид.

Дар Telegram, Facebook, Instagram, OK ва ВК бо мо бимонед.