Президенти Тоҷикистон Эмомалӣ Раҳмон бо сафари расмӣ ба Покистон меравад, хабар доданд ба “Азия-Плюс” аз хадамоти матбуоти президент.

Сафари расмии сарвари давлати Тоҷикистон ба ин кишвар рӯзҳои 14-15 декабр баргузор мешавад.

Бино ба иттилои хадамоти матбуоти президент, зимни сафар Эмомалӣ Раҳмон бо сарвазири Покистон ва намояндагони воломақоми сенати ин кишвар дидору гуфтушунид мекунад.

“Ҷонибҳо дурнамои ҳамкориҳои дуҷонибаро дар соҳаҳои тиҷорату иқтисод баррасӣ мекунанд. Ҳамчунин масоили ҳамкориҳо дар бахшҳои сармоягузорӣ ба энергетика, нақлиёт, фарҳанг ва ғайра баррасӣ хоҳанд шуд”, - хабар доданд дар хадамоти матбуот.

Зикр шуд, ки дар ҷараёни дидору гуфтушунидҳо баррасии масоили амният дар минтақа, аз ҷумла вазъият дар Афғонистон дар назар аст.

Қобили зикр аст, ки пеш аз ин президенти Тоҷикистон Эмомалӣ Раҳмон моҳи июни соли гузашта ба Покистон ташриф оварда буд.

Дар Telegram, Facebook, Instagram, OK ва ВК бо мо бимонед.