Дар Тоҷикистон бояд ҳуқуқи хабарнигорон ба озодии баён риоя шавад. Дар ин бора дар паёми табрикии сафир Мануэл П. Микаллер аз номи сафорати ИМА дар Тоҷикистон, ки ба муносибати Рӯзи матбуоти тоҷик дар саҳифаи сафорат дар  Facebook нашр шудааст, сухан меравад.

“Расонаҳои озоду мустақил ба ҷомеа имкон медиҳанд, ки ба иттилоот пайваст шаванд, қарорҳои оқилона қабул кунанд ва андешаҳои гуногунро бишнаванд”, - омадааст дар паём.

Гуфта мешавад, матбуоти мустақил як унсури асосии бунёди демократия дар Тоҷикистон ва дар саросари ҷаҳон аст.

«Иёлоти Муттаҳидаи Амрико рушди касбии журналистонро дар Тоҷикистон фаъолона дастгирӣ мекунад. Мо ин корро тавассути барномаҳои мубодила, дарсҳои забони англисӣ, сафарҳои иттилоотӣ ва дастгирии техникии расонаҳо анҷом медиҳем”, - зикр мешавад дар табрикот.

Дар он ҳамчунин аз ҳукумати Тоҷикистон даъват шудааст, ки аз ҳуқуқи хабарнигорон ҳимоят кунад ва озодии баёни онҳоро эҳтиром кунад.

Дар Telegram, Facebook, Instagram, OK ва ВК бо мо бимонед.