Эмомалӣ Раҳмон, раисҷумҳури Тоҷикистон бо даъвати Владимир Путин, раисҷумҳури Русия барои таҷлили Рӯзи Ғалаба ба Маскав меравад ва дар ин ҷашн ширкат меварзад. Дар ин бора бо такя ба як манбааш РИА “Новости” хабар медиҳад.

“Ба хотири ин чорабиниҳо бахшида ба 79‑умин солгарди Рӯзи Ғалаба дар Душанбе рӯзи 8‑уми май баргузор мешаванд”, - гуфтааст манбаъи хабаргузорӣ.

Хадамоти матбуоти раисҷумҳури Тоҷикистон хабари мазкурро ба Азия-Плюс тасддиқ ё рад накарданд.

Ёдовар мешавем, ки Эмомалӣ Раҳмон зимни як сӯҳбати телефонӣ бо Владимир Путин аз роҳбари кишвари Русия барои иштирок дар нишасти ғайрирасмии сарони кишварҳои ИДМ ба муносибати таҷлили Рӯзи Ғалаба дар Маскав даъватнома дарёфт намуд.

Эмомалӣ Раҳмон меҳмони танҳо дар Маскав нахоҳад буд. Мувоффиқи иттилои Интерфакс, ки бо такя ба хадамоти матбуотии президенти Қирғизистон навиштааст, “раисҷумҳури Қирғизистон Садир Жапаров рӯзҳои 8‑9 уми май дар нишасти ғайрирасмии сарони кишварҳои ИДМ ва чорабиниҳо ба муносибати Рӯзи Ғалаба ширкат менамояд”.

Маълум нест, ки дигар роҳбарони кишварҳои Осиёи Марказӣ ҳам дар ин чорабинӣ ширкат мекунанд ва ё на.

Иштироки сарони кишварҳои ИДМ дар Рӯзи Ғалаба дар Маскав ҳамасола сурат мегирад. Бояд зикр намуд, ки соли гузашта низ Эмомалӣ Раҳмон дар ҷашни Рӯзи Ғалаба дар Маскав иштирок намуда буд.

Дар соли 2023 дар Рӯзи Ғалаба президентҳои Тоҷикистон, Туркманистон, Қирғизистон, Қазоқистон, Ӯзбекистон, Беларус, ва сарвазири Арманистон  иштирок намуда буданд.

Дар Telegram, Facebook, Instagram, OK ва ВК бо мо бимонед.