Президенти Кореяи Ҷанубӣ Юн Сок Ёл сафири кишварро дар Тоҷикистон иваз кард. Роҳбари нави намояндагии дипломатӣ Чон Сок Син таъин шуд.

Тавре ки Агентии иттилоотии Yonhap хабар медиҳад, Юн Сок Ёл рӯзи 20 август ба дипломат эътимоднома дод, ки ба президенти Тоҷикистон супурда мешавад.

Муносибатҳои дипломатӣ байни Тоҷикистон ва Кореяи Ҷанубӣ 27 апрели соли 1992 роҳандозӣ шуданд. Сафорати Кореяи Ҷанубӣ дар Душанбе соли 2008 ва сафорати Тоҷикистон дар Сеул - соли 2015 ифтитоҳ гардиданд.

То соли 2022 ба сафорат дар Душанбе кордори муваққатии Ҷумҳурии Корея дар Тоҷикистон роҳбарӣ мекард. Моҳи январи ҳамон сол нахустин сафири ин кишвар - Квонг Донг Сок омад, ки акнун дипломати навтаъин ӯро иваз мекунад.

Ҷумҳурии Корея дар Тоҷикистон дар бахшҳои нақлиёт, логистика, энергетика, навсозии соҳаи саноат, кишоварзӣ, тағйирёбии иқлим, тандурустӣ ва ғайра лоиҳаҳо амалӣ мекунад. Аз ҷумла, Агентии рушди байнулмилалии Корея (КОIСА) дар маблағгзории таҳияи заминаи фанниву иқтисодӣ дар лоиҳаи сохтмони роҳи оҳани Ҷалолиддини Балхӣ - Панҷи Поён то сарҳади Афғонистон саҳм мегузорад.

Аз моҳи апрели соли 2017 дар Сеул намояндаи доимии Палатаи савдо ва саноати Тоҷикистон фаъолият дорад.

Тибқи маълумоти Вазорати корҳои хориҷии Тоҷикистон, дар зарфи 9 моҳи соли 2023 ҳаҷми гардиши молу маҳсулот байни кишварҳо зиёда аз 96 млн долларро ташкил додааст.

Дар Telegram, Facebook ва Instagram бо мо бимонед.