Имрӯз, 2-юми октябр Эмомалӣ Раҳмон, раисҷумуҳури Тоҷкистон барои ширкат дар нишасти сеюми “Муколамаи ҳамкории Осиё” бо сафари корӣ ба Қатар рафт.

Хадамоти матбуотии президент хабар медиҳад, ки ӯро дар фурудгоҳи байналмилалии шаҳри Давҳа Султон ал-Мурайхӣ, вазири Вазорати корҳои хориҷии Давлати Қатар ва дигар намояндагони ин кишвар пешвоз гирифтанд.

Қаблан дар Ню-Йорк Эмомалӣ Раҳмон дар ҳошияи мубоҳисаҳои солонаи СММ бо Тамим ибни Ҳамад оли Сонӣ амири Давлати Қатар мулоқот карда буд.

Дар ин вохӯрӣ масоили вобаста ба ҳамкории дуҷониба ва чанде аз мавзуъҳои минтақавию ҷаҳонӣ ва ба рӯзномаи ҳамоиши сарони давлатҳо дар “Муколамаи Осиё оид ба ҳамкорӣ”, баррасӣ гардидаанд.

Маълум нест, ки дар нишасти сеюми “Муколамаи ҳамкории Осиё” кадом масоил мавриди баррасӣ қарор мегиранд.

Гуфта мешавад, ки дар ин сафар раисҷумҳурро муовини сарвазир, вазири корҳои хориҷӣ, вазири молия, ёрдамчии раисҷумҳур оид ба масъалаҳои робитаҳои хориҷӣ ва дигар шахсони расмӣ ҳамроҳӣ мекунанд.

Дар Telegram, Facebook ва Instagram бо мо бимонед.