Масъуд Пизишкиён, раиси ҷумҳури Эрон пагоҳ, 15-уми январ, бо як сафари давлатӣ ба Тоҷикистон меояд. Дар ин бора аз Вазорати корҳои хориҷии Тоҷикистон ба АМИТ “Ховар” хабар додаанд.

Қаблан аз Вазорати корҳои хориҷии Тоҷикистон ба “Азия-Плюс” хабар дода буданд, ки дар доираи сафари Масъуд Пизишкиён ба ғайр аз мулоқоти роҳбарони ду кишвар, инчунин, дигар вохӯриву гуфтугӯҳо ва имзои чанд санади мухталиф дар назар аст.

Ҳамчунин, дар доираи ин сафар як ҳайати баландпоя иборат аз соҳибкорону тоҷирони эронӣ низ ба Душанбе меоянд ва бо ҳамтоёни тоҷики худ масъалаи ҳамкориро баррасӣ мекунанд.

АМИТ “Ховар” менависад, дар доираи сафар баргузории Ҳамоиши тиҷоратӣ, сармоягузорӣ ва гардишгарии Тоҷикистон ва Эрон дар назар аст.

Бояд гуфт, Масъуд Пизишкиён ҳамчун раисҷумҳури Эрон бори нахуст ба Тоҷикистон меояд.

Дар хусуси барномаи ин сафар муфассал дар матлаби “Мулоқот бо Эмомалӣ Раҳмон ва имзои чанд санад. Бархе ҷузъиёти сафари раисҷумҳури Эрон ба Тоҷикистон” мутолиа кунед.

Дар Telegram, Facebook ва Instagram бо мо бимонед.